Avokati Valdet Hoxha ka komentuar aktakuzën ndaj gjashtë serbëve për rastin e barrikadave në veri më 2022 dhe pezullimin e hetimeve ndaj Milan Radoiçiqit dhe të dyshuarve të tjerë.
Në emisionin “Ditari” në Tëvë1, Hoxha tha se pezullimi i hetimeve është vendim procedural për të shmangur parashkrimin e veprave penale.
“Ashtu siç parashihet procedura për ngritjen e aktakuzës në raste të caktuara parashihen edhe parashkrimi i këtyre veprave penale, prandaj me qëllim të mos kalimit të këtij afati Kodi i Procedurës Penale parasheh edhe pezullimin e fazës së hetimit…”, tha Hoxha.
Ai shtoi se kjo nuk nënkupton mbyllje të rastit, por pezullim të përkohshëm deri në krijimin e kushteve për sjelljen e të dyshuarve para drejtësisë.
“Nuk është përfundim i hetimeve por pezullim i përkohshëm… derisa të bëhet e mundur që të gjithë të dyshuarit të vihen para mekanizmave kompetentë në Republikën e Kosovës”, u shpreh ai.
Hoxha theksoi gjithashtu se të dyshuarit duhet të përballen me drejtësinë, duke respektuar procesin e rregullt gjyqësor dhe prezumimin e pafajësisë.
Ndryshe, Prokuroria Speciale e Kosovës ka ngritur aktakuzë ndaj gjashtë personave, të cilët tha se dyshohen për veprat penale kundër rendit kushtetues. Rasti ka të bëjë me ngritjen e bllokadave komunat veriore të Kosovës – të banuara me shumicë serbe – më 10 dhjetor 2022, të cilat ishin larguar më 29 dhjetor të atij viti.
Prokuroria Speciale tha se D.M., D.D., M.R., N.J., N.O., dhe S.V., nga 10 dhjetori deri më 29 dhjetor në komunat veriore të Kosovës, “duke vepruar në bashkëkryerje dhe përmes përdorimit të forcës dhe dhunës, kanë penguar institucionet e Republikës së Kosovës në vendosjen e rendit kushtetues, ushtrimin e autoritetit shtetëror dhe kryerjen e detyrave zyrtare në këto komuna”.
Sipas organit ndjekës, ndaj 11 personave të tjerë të identifikuar me iniciale M.R., A.S., A.F., A.J., R.S., S.A., D.V., S.P., V.R., M.R., dhe M.R., janë pezulluar hetimet, “pasi ata deri më tani janë të paarritshëm” për organet e drejtësisë së Kosovës.
Të gjashtë të akuzuarit, tha Prokuroria, dyshohet se kanë bllokuar rrugët kryesore me mjete të forta, përfshirë kamionë të mbushur me zhavorr, ekskavatorë, autoambulanca, autobusë dhe automjete të tjera.
“Po ashtu, nga veprimet e tyre rezulton se, në rast të ndërhyrjes së Policisë së Kosovës për largimin e barrikadave dhe rivendosjen e lirisë së lëvizjes, pjesëtarët e grupit kanë qenë të gatshëm t’i sulmonin zyrtarët policorë me mjetet që kishin në dispozicion”, tha Prokuroria Speciale përmes një njoftimi.
Ata dyshohen për veprat penale: Bashkim për veprimtari kundërkushtetues me qëllim të të sulmit kundër Rendit Kushtetues të Republikës se Kosovës dhe pengim i personit zyrtar në kryerje të detyrës zyrtare.
