I ftuar në “Info Nata” me Ardian Visokën në Tëvë 1, Hoxha ka thënë se në mediat ruse rreth 8 vjet më parë është përfolur çdo ditë tema për mundësinë e krijimit të një konflikti të tillë mes Rusisë dhe Ukrainës dhe është krijuar bindja e popullit rus se kjo është një gjë e mirë.
“Lufta në Ukrainë nuk ka filluar para 19 ditëve por ka filluar në vitin 2014 me aneksimin e Krimesë. Në vitin 2014 kemi parë një ngritje të disa qindra narracioneve ruse, të propagandës ruse, të fake news në Ukrainë dhe kemi parë ndërtimin e narracioneve strategjike kundër Ukrainës. Këtë punë edhe shteti ukrainas e ka parë, e ka ditë dhe është përgatitur për një sulm të tillë. Në mediat ruse i ka diku rreth 8 vjet që kjo punë përflitet çdo ditë dhe është krijuar bindja e popullit rus se kjo është një gjë e mirë”, ka thënë Hoxha në Tëvë1.
