Drejtori i Përgjithshëm i Policisë së Kosovës, kolonel Gazmend Hoxha, të mërkurën ka mbajtur një takim me drejtorët rajonal dhe komandantët e stacioneve policore, ku janë prezantuar dhe analizuar të arriturat e gjashtëmujorit të parë të vitit 2025.
Përveç kësaj, në takim thuhet se janë diskutuar edhe çështjet që ndërlidhen me performancën në punë, integritetin, disiplinën dhe rritjen e mëtejmë të profesionalizmit policor.
Po ashtu, sipas Policisë, Hoxha nga drejtorët rajonal, komandantët e stacioneve, por edhe nga të pranishmit ka kërkuar që të zbatohen në përpikëri, me profesionalizëm dhe integritet të gjitha procedurat e parapara ligjore, udhëzimet dhe rregulloret policore.
“..si dhe synimet, detyrat dhe objektivat strategjike policore me theks të veçantë: Rritjen e bashkëpunimit dhe qasjes më proaktive me komunitetin, Rritjen e bashkëpunimit dhe komunikimit të mirëfilltë me qytetarët, Rritjen e performancës, integritetit, mbikëqyrjes më efikase dhe disiplinës në punë nga eprorët, Parandalimin, hetimin dhe zbulimin e veprimtarive kriminale dhe luftën kundër korrupsionit, Uljen e shkallës së krimit të të gjitha formave, Ngritjen e sigurisë në trafik dhe parandalimin e aksidenteve, Ofrimin e sigurisë ndaj të gjithë qytetarëve pa dallim dhe ruajtjen e rendit kushtetues”, thuhet në njoftim.
Ndër të tjera, drejtori Hoxha, bëhet e ditur se ka theksuar që përmes zbatimit të ligjit, menaxhimit sa më efikas të burimeve njerëzore dhe atyre logjistike, mbikëqyrjes së performancës së zyrtarëve policorë nga eprorët e drejtpërdrejtë, mund të arrihen rezultate edhe më pozitive në shumë sfera policore.
“Në këtë takim të gjithë të pranishmit u zotuan për angazhime të mëtejme me qëllim të përmbushjes së detyrave dhe obligimeve policore, të cilat janë në interes të qytetarëve dhe të vendit”, theksohet në njoftim.
