Ish-zëvendësministri i Punëve të Brendshme, Valdet Hoxha, ka thënë se asnjë nga zyrtarët policorë të përfshirë në rastin e vdekjes së 27-vjeçarit nga Lipjani nuk duhet paragjykuar dhe shpallur të fajshëm përderisa nuk ka një vendim të formës së prerë të gjykatës.
Hoxha në emisionin “Ditari” në Tëvë1 po ashtu ka theksuar se rasti nuk duhet të shërbejë si arsye për të paragjykuar apo etiketuar negativisht gjithë institucionin e policisë.
“Mos të paragjykojmë duke I shpallur të fajshëm dhe përgjegjës asnjë nga zyrtarët përderisa nuk ka një vendim të formës së prerë të gjykatës sepse themeli i drejtësisë është parimi i prezumimit të pafajësisë. Nuk ka përgjegjësi kolektive, pra secili individ mund të ketë përgjegjësinë personale të tij dhe edhe në këtë rast secili nga zyrtarët policorë varësisht nga zhvillimi i hetimeve mund të ketë përgjegjësinë e vet për veprimet apo mosveprimet e tyre dhe asesi as nuk duhet të paragjykohen si grup pesë zyrtarët e dyshuar dhe asesi të mos gjykohet në tërësi organizata policore dhe të etiketohet Policia me gjithë fatkeqësisht lëshimet e kohëve të fundit në disa raste që ka filluar ta humb imazhin”, ka thënë Hoxha.
Megjithatë, sipas tij, rasti i 27-vjeçarit duhet të jetë një pikë kthese për Policinë e cila siç vlerëson ai varësisht nga rezultatet e këtij hetimi duhet të ndërmarrë disa hapa reformues.
“Unë po besoj që ky rast duhet të jetë një pikë kthese ku varësisht prej rezultateve të hetimeve duhet ndoshta të ndërmerren disa hapa reformues brenda stacioneve policore e sidomos në Akademinë e Policisë të trajnimeve duke shtuar afatin e trajnimeve për zyrtarët policorë të rinj e po ashtu duke I dhënë theks të vecantë përdorimit të forcës si asaj duarthatë po ashtu edhe përdorimit të armës që me ligj i kanë të autorizuara zyrtarët policorë “, ka theksuar Hoxha.
