Deputeti i LDK’së, Avdullah Hoti, ka thënë se kriza politike në demokraci ndodhin, por kur ato thellohen dhe zgjasin janë papërgjegjësi e forcave politike.
“Krizat politike në një demokraci mund të ndodhin, por është papërgjegjësi e forcave politike nëse ato thellohen dhe zgjasin, duke krijuar kosto për çdo qytetar dhe biznes.”
Ai ka thënë se institucionet nuk mund të formohen pa u siguruar shumica parlamentare. Sipas tij VV ka dështuar ta formojë këtë shumicë dhe shton se ajo duhet të kërkojë konsultime me partitë tjera.
“Pavarësisht të drejtës që ka partia e parë që del nga zgjedhjet për të propozuar kandidatin për Kryetar të Kuvendit dhe për të marrë e para mandatin për formimin e Qeverisë, institucionet e reja që duhet të dalin nga zgjedhjet nuk mund të formohen pa u siguruar shumica parlamentare. Ky është një rregull elementar i sistemit tonë kushtetues, i cili është i ngjashëm me shumicën e sistemeve kushtetuese të demokracive perëndimore. Pas 27 dështimeve për të zgjedhur Kryetarin e Kuvendit, është e qartë se partia e parë ka dështuar të formojë shumicën parlamentare. Rrjedhimisht, ajo duhet ta pranojë këtë dhe të kërkojë konsultime me partitë e tjera për modalitetet kushtetuese të daljes nga kriza politike.”
Hoti ka përsëritur qëndrimin e LDK’së që të jetë opozitë por përmendi edhe propozimin për qeveri gjithëpërfshirëse kalimtare. Për këtë të fundit thotë se nuk ka konsensus.
“LDK-ja, në mungesë të krijimit të një shumice parlamentare dhe duke e bërë të qartë se, për shkak të rezultatit zgjedhor, do të qëndrojë në opozitë pa u bërë pjesë e asnjë lloj shumice parlamentare, ka propozuar një qeveri gjithëpërfshirëse kalimtare, me mandat dhe kohë të kufizuar. Ky propozim kërkon konsensus nga të gjitha forcat politike, konsensus i cili duket qartë se nuk ekziston.”
Ai ka thënë se është detyrim i forcave politike që të ulen sa më parë dhe të bien dakord për një datë të re zgjedhjesh.
“Rrjedhimisht, është detyrim i forcave politike që të ulen sa më parë dhe të bien dakord për një datë të re zgjedhjesh. Vendi nuk mund të lihet pa institucione. Nëse forcat politike nuk arrijnë të merren vesh për të formuar shumicën parlamentare, atëherë fjalën duhet ta ketë sërish sovrani.”
