Deputeti i LDK-së, Avdullah Hoti ka kritikuar Qeverinë e Kosovës për shtyrjen e procesit të regjistrimit të popullsisë, në prill 2024.
Hoti ka thënë se vonimi i këtij procesi do të këtë pasoja ekonomike dhe sociale për Kosovën.
Ai ka renditur edhe katër pikat, ku sipas tij do të ndikojë negativisht vonimi i procesit të regjistrimit të popullsisë.
“Të gjitha të dhënat tregojnë se vonimi në regjistrimin e popullsisë do të këtë pasoja të gjëra ekonomike dhe sociale për vendin. E para që është kryesorja, është mosshpërndarja në mënyre efektive të të gjitha burimeve e në veçanti e buxheti për shkolla, spitale, infrastrukturë, shërbime publike dhe në veçanti për komuna, sepse grandet që ne shpërndajmë për komuna, nga grandi i përgjithshëm për arsim e shëndetësi marrin për bazë edhe numrin e popullsisë dhe për këtë mungesa e numrit të popullsisë do të nënkuptojë edhe 2 vite tjera nuk do të mundën që të përdorën të dhëna të sakta për të shpërndarë buxhetin nëpër komuna në mënyre efektive.
E dyta, shumë e rëndësishme po ashtu për sektorin privat në vendimmarrjen e bizneseve, kur bizneset marrin vendime për të investuar, për të organizuar rrjetin e tyre, këtë e bëjnë në bazë të planifikimit të tyre, bazuar në kërkesën e cila për bazë ka numrin e qytetarëve dhe kërkesën që vjen nga qytetarët për produkte dhe për shërbime të ndryshme.
Tjetër është cenimi i integritetit dhe saktësisë statistikore…në mungesë të të dhënave për popullsinë, mostrimi dhe anketimi në teren nuk është i saktë, që nënkupton të gjitha të dhënat që i përdorim në vendimmarrje në institucione të ndryshme në bazë të raportit të ASK-së nuk do të jenë të sakta dhe e fundit dot pamundësohet krahasimi ndërkombëtare për Kosovën. Si mund të krahasohet nesër Kosova për të ardhurat për kokë të banorit…dhe për të dhëna të tjera. Tani ne mund të bëjmë kurban njerëz siç po bënë Qeveria”, ka thënë ai.
Qeveria e Kosovës të mërkurën ka marrë vendim që të shtyhet procesi i regjistrimit të popullsisë.
