Sipas deputetit të Lidhjes Demokratike të Kosovës, Avdullah Hoti këto para janë ndarë për borxhin e furnizimit të komunave veriore me rrymë, teksa shtoi se janë para të projekteve kapitale që Qeveria nuk i ka realizuar.
“Qeveria sot ka ndarë 17.5 mil euro për borxhin e KOSTT-it ndaj Rrjetit Evropian për furnizimin e komunave në veri. Vite me radhë shanin për të njëjtën gjë. Për dijeni, këto mjete janë të projekteve kapitale që nuk janë realizuar”, ka shkruar Hoti në Facebook.
Tutje Hoti ka rikujtuar edhe vendimet e fundit të Qeverisë Kurti, teksa ka ironizuar duke thënë se “kjo është qeverisje se jo mahi”.
“Zgjedhjet në veri i shtynë për prill, vendimin për tabela e shtynë pa afat, të arrestuarin për terrorizëm e liruan. Tani, para se të nisin festën e vitit të ri, ua paguajnë edhe rrymën atyre që vendosën barrikadat. Kjo është qeverisje se jo mahi!”, ka shkruar Hoti.
