Kandidati për deputet i LDK-së, Avdullah Hoti, ka kritikuar Qeverinë e Kosovës për refuzimin e projektit amerikan të gazit, duke e cilësuar si një veprim që cenon sigurinë energjetike dhe orientimin strategjik të vendit.
Hoti ngriti tri pyetje që, sipas tij, duhet të marrin përgjigje nga secili politikan dhe qytetar në Kosovë.
“Pse Kurti e refuzon projektin e gazit amerikan, në situatën kur të gjitha vendet e rajonit po përfshihen në këtë projekt strategjik për të dalë nga sfera e ndikimit rus? Pse nuk është bërë asgjë në gjashtë vite qeverisje sa i përket ndërtimit të kapaciteteve të reja energjetike? Kujt i intereson që Kosova të vazhdojë të jetë e varur nga importi i energjisë?”, ka shkruar Hoti.
Ai ka shprehur keqardhje për atë që e cilësoi si mungesë reagimi serioz nga opozita ndaj kësaj çështjeje, duke thënë se tema e gazit po përdoret vetëm gjatë fushatave zgjedhore.
Sipas Hotit, projekti i gazit nuk është thjesht një investim ekonomik, por lidhet drejtpërdrejt me orientimin gjeopolitik të Kosovës, sigurinë energjetike dhe raportet me Shtetet e Bashkuara të Amerikës.
“Heshtja përballë një dëmi të tillë nuk është neutralitet – është bashkëfajësi”, ka theksuar ai.
Hoti ka përmendur gjithashtu suspendimin e Kosovës nga stërvitja ushtarake “Defender Europe 2023” dhe pezullimin e dialogut strategjik Kosovë-SHBA në vitin 2025, duke i cilësuar këto si zhvillime që kanë dëmtuar interesat shtetërore të Kosovës.
Në fund, ai ka kritikuar partitë opozitare për mungesë kauzash shtetërore, vizioni dhe guximi politik, duke thënë se fokusi i tyre është përqendruar më shumë te postet shtetërore sesa te çështjet strategjike për vendin.
