Deputeti nga radhët e Lidhjes Demokratike të Kosovës (LDK), Avdullah Hoti, ka publikuar disa të dhëna të Agjencisë së Statistikave të Kosovës, lidhur me gjendjen financiare të familjeve në vend.
Hoti ka thënë se ndihma e njëhershme nuk është zgjidhje për zbutjen e pasojave të inflacionit, derisa ka thënë se zgjidhja do të ishte indeksimi i pensioneve dhe asistencës sociale, së paku për aq sa ka qenë inflacioni, si dhe zgjerimi i përkohshëm i listës së mallrave me normë të reduktuar të TVSH-së.
Sipas të dhënave që u është refuruar Hoti, 43.4 përqind e familjeve nuk mund të përballojnë një shpenzim të papritur prej 100 eurove nga burimet e tyre vetanake, 49.2% e familjeve nuk mund të mbulojnë shpenzimet e një shujte çdo dy ditë që përfshinë mishin, pulën dhe peshkun, 48.8% e familjeve kanë deklaruar se pagesa e borxheve është barrë e rëndë financiare dhe 8.1% e familjeve kishin vështirësi të mëdha, ndërkaq 20.1% përballeshin me vështirësi, në kryerjen e pagesave të nevojshme të zakonshme të familjes, marrë parasysh të ardhurat.
“Shkaktari burimor i kësaj situate është inflacioni. Por, thellimi i krizës erdhi si rezultat i mungesës së masave adekuate për të zbutur pasojat e inflacionit për familjet. E kemi ngritur vazhdimisht në Kuvend dhe jashtë Kuvendit, se ndihma e njëhershme nuk është zgjidhje për zbutjen e pasojave të inflacionit. Tani këtë po e dëshmojnë statistikat e Qeverisë”, ka shkruar Hoti.
