Deputeti i LDK-së Avdullah Hoti, ka thënë se ndikimi i buxhetit gjatë mandatit të Qeverisë Kurti në ekonomi dhe shoqëri është pothuajse zero.
Hoti tha se investime kapitale që janë planifikuar nuk janë realizuar.
“Buxheti katërvjeçar gjatë këtij mandati qeverisës, ka qenë 11.4 miliardë euro. Ndikimi në ekonomi dhe shoqëri është pothuajse zero, në kontekst të ndryshimit të strukturës ekonomike dhe shoqërore të vendit…Edhe ato investime kapitale që janë planifikuar nuk janë realizuar. Për mandatin 2021-2024 kanë qenë të planifikuara 3 miliardë euro, janë realizuar vetëm 1.2 miliardë euro”, tha ai.
Ai tutje gjatë seancës plenare të Kuvendit, tha se gjithkush që ka njohuri elementare të ekonomisë, e di që me subvencione mbahen familjet dhe njerëzit në nevojë, por nuk zhvillohet ekonomia.
“Janë rreth 520 milionë euro subvencione të paguara për entitetet publike, gjatë këtij mandati. 113 milionë euro, subvencione për energjinë në veri, me të cilat jam i sigurt që do të ishte financuar plotësisht projekti i gazit për energji”, shtoi Hoti.
Seanca e Kuvendit sot ka vetëm një pikë në rend dite, që është shqyrtimi i buxhetit prej 3.6 miliardë eurosh.
Partitë opozitare, LDK, PDK dhe AAK janë deklaruar se nuk do ta votojnë buxhetin e Kosovës.
Por, nga partia në pushtet, Lëvizja Vetëvendosje kanë thënë se e kanë shumicën parlamentare për ta votuar buxhetin e Republikës për vitin e ardhshëm.
