Deputeti i Lidhjes Demokratike të Kosovës, Avdullah Hoti, thotë se nuk është përmirësuar asnjë indikator i performancës së ndërmarrjeve publike.
Sipas tij, këtë e konfirmojnë të dhënat e Qeverisë të prezantuara në pjesën tekstuale të projekt-buxhetit për vitin 2024.
“Pavarësisht ndaljes së ‘gjakderdhjes financiare’ dhe ndryshimit të menaxhmentit, nuk është përmirësuar asnjë indikator i performancës së ndërmarrjeve publike. Këtë e konfirmojnë të dhënat e Qeverisë të prezantuara në pjesën tekstuale të projekt-buxhetit për vitin 2024”, ka shkruar Hoti në Facebook.
Hoti, thotë se të hyrat totale, fitimi dhe detyrimet e ndërmarrjeve publike, si përqindje e Produktit të Brendshëm Bruto, kanë mbetur të njëjta.
“Ndërkaq, asetet dhe ekuiteti i ndërmarrjeve publike kanë rënë. Fatkeqësisht, subvencionet nga buxheti për entitete publike janë katërfishuar krahasuar me vitin 2019, si vit para pandemisë”, ka shkruar ai tutje./teve1.info/
