Deputeti i Kuvendit nga rradhët Lidhjes Demokratike të Kosovës, Avdullah Hoti, kushtëzimin e Kosovës për njohje reciproke nuk e sheh mungesë të rezultatit të takimit të së enjtes në Bruksel mes kryenegociatorëve të Kosovës dhe Serbisë, Bislmi dhe Petkoviq.
Sipas tij, mungesë e rezultatit është kundërshtimi i Kosovës për kohën e themelimit të asociacionit, të cilin Qeveria LVV-Guxo, me Marrëveshjen e Ohrit dhe draftin e statutit të asociacionit, e avancoi dhe e nxori jashtë rendit kushtetues të Kosovës.
“Mungesa e rezultatit të takimit nuk është për shkak të kushtëzimit të Kosovës për njohje reciproke, si mundësia e vetme për normalizim të marrëdhënieve mes dy vendeve. Qeveria LVV-Guxo, qysh në fillim, ka hequr dorë nga ky kushtëzim duke e braktisur dialogun për njohje të nisur në qeverinë e udhëhequr nga LDK-ja. Mungesa e rezultatit të këtij takimi lidhet me kundërshtimin e Kosovës për kohën e themelimit të asociacionit, të cilin Qeveria LVV-Guxo, me Marrëveshjen e Brukselit/Ohrit dhe draftin e statutit të asociacionit, e avancoi dhe e nxori jashtë rendit kushtetues të Kosovës”, ka shkruar ai në Facebook.
Hoti ka thënë se, Qeveria LVV-Guxo e di mirë se Marrëveshja e Bukselit/Ohrit dhe drafti i statutit të asociacionit janë në kundërshtim me Kushtetutën dhe prandaj nuk e procedojnë draftin në Gjykatën Kushtetuese.
“Këta e dinë mirë se Marrëveshja e Bukselit/Ohrit dhe drafti i statutit të asociacionit janë në kundërshtim me Kushtetutën. Kjo edhe është arsyeja përse nuk e procedojnë atë draft për opinion në Gjykatën Kushtetuese, duke ia bartur problemin qeverisë së ardhshme. Tani kjo Marrëveshje është bërë pjesë e kushteve në rrugëtimin e Kosovës drejt BE-së dhe NATO-s, duke krijuar kështu problem edhe më të madh për vendin, duke qenë se me të është vendosur një status-quo e re për Kosovën, duke stopuar njohjet e reja dhe anëtarësimet në organizata ndërkombëtare”, ka shtuar ai.
Më tej, ai është shprehur se qeveria aktuale e Kosovës është e vetmja nga shpallja e pavarësisë pa asnjë progres në dialog, pasi sipas Hotit qeveritë e kaluara i kanë mundësuar progres Kosovës në këtë drejtim edhe pse ka qenë i natyrës teknike.
“Progresi në dialog në qeveritë e kaluara, edhe pse i natyrës teknike, dhe forcim i aleancave i kanë mundësuar Kosovës me tjerash: nënshkrimin e Marrëveshjes së Stabilizim-Asocimit (Qeveria Mustafa), mbështetjen nga aleatët për themelimin e ushtrisë duke dakorduar me aleatët planin 10-vjeçar të transformimit të FSK-së në ushtri të rregullt (Qeveria Haradinaj), nisjen e dialogut për marrëveshje finale për njohje reciproke dhe normalizim të marrëdhënieve (Qeveria Hoti), nënshkrimin e Marrëveshjes së Uashingtonit, e rëndësisë strategjike për Kosovën dhe gjithë shqiptarët, përfshirë këtu edhe njohjen nga Izraeli (Qeveria Hoti). Qeveria LVV-Guxo është e vetmja nga shpallja e pavarësisë pa asnjë progres në këtë drejtim, pa asnjë njohje apo anëtarësim, pa asnjë marrëveshje strategjike. Përkundrazi, marrëveshja e Brukselit/Ohrit e ka stopuar rrugën e integrimit euro-atlantik të Kosovës”, ka thënë ai.
Për Hotin, LVV-Guxo e kanë futur Kosovën në një batak prej të cilit mund ta nxjerrë një qeveri me energji të reja.
“Kosovës i duhet një qeveri me energji të reja, përvojë e vizion të qartë, për të rikonfirmuar aleancat dhe nxjerrë vendin nga bataku ku e kanë futur LVV-Guxo në këto katër vite”, ka përfunduar postimin e tij Hoti./teve1.info/
