Ministri i Financave, Hekuran Murati, gjatë seancës së sotme në Kuvendin e Kosovës e ka prezantuar marrëveshjen në mes të Kosovës dhe Fondit OPEK në vlerë prej 40 milionë Dollarëve, e cila tha se është pjesë e marrëveshjes me Bankën Botërore e cila është ratifikuar më parë në Kuvendin e Kosovës, raporton teve1.info
Kundër kësaj marrëveshje ka dalë Lidhja Demokratike që në krye me Avdullah Hotin e kundërshtojnë, ku ky i fundit ka thënë se për këtë marrëveshje nuk ka pasur kurrfarë diskutimi.
“Sot po shqyrtojmë një marrëveshje ndërkombëtare në parim si Grup Parlamentar, gjithmonë e kemi mbështetur marrëveshjet ndërkombëtare, përveç kur kemi pasë vërejtje substanciale për ato marrëveshje për të cilat zakonisht kemi tentu t’i tejkalojmë t’i diskutojmë me Qeverinë dhe me Grupet Parlamentare tjera”, tha ai gjatë fjalimit sot në seancë plenare.
Tutja ai është shprehu se kjo marrëveshje është kredi për të miratuar ligje, nuk është kredi për investime kapitale.
“Kjo marrëveshje është me fondin OPEC për zhvillim ndërkombëtar, pra vendeve anëtare të OPEC-ut-40 milionë dollarë. Është kredi për të miratuar ligje, nuk është kredi për investime të ndonjë rruge ose për investime kapitale, si zakonisht qysh kemi marrë kredi nga institucionet financiare ndërkombëtare. Thotë që ‘mbështetur në strategjinë kombëtare të zhvillimit 2030’, nuk e di që është diskutuar kjo në parim që është miratu, ku janë definu objektivat, ku ndër ato objektiva është me marrë edhe një kredi për me miratu ligje”, u shpreh Hoti, raporton teve1.info
Sipas tij, si grup parlamentar ajo që është problematike është qëllimi se pse po merret kjo kredi.
“Ajo që është problematike për mendimin tonë është që qëllimi pse po merret kjo kredi. Unë besoj që kjo nuk ka asnjë kuptim”, deklaroi ish-kryeministri.
