Ish-kryeministri i Kosovës dhe anëtari i LDK-së, Avdullah Hoti, ka reaguar para mbajtjes së kuvendit të jashtëzakonshëm të kësaj partie, duke e cilësuar atë si “demokraci në veprim” brenda LDK-së.
Hoti ka thënë se thirrja e këtij kuvendi dëshmon se LDK-ja ka mekanizma statutorë dhe demokratikë për të reflektuar, për t’u konsoliduar dhe për t’u bërë më e fuqishme.
“Sot, kuvendi i jashtëzakonshëm i LDK-së është praktikisht ‘demokracia në veprim’ brenda partisë. Thirrja e këtij kuvendi është dëshmi se LDK-ja ka mekanizmat e saj statutorë dhe demokratikë për të reflektuar, për t’u konsoliduar dhe për t’u bërë më e fortë”, ka shkruar Hoti.
Ai ka shprehur bindjen se nga ky kuvend LDK-ja do të dalë më e bashkuar dhe më e përgatitur për të synuar rikthimin në skenën politike si forcë kryesore.
“Nga ky Kuvend do të dalim më të fortë për ta kthyer LDK-në si forcën kryesore politike në Kosovë. Vetëm një LDK e fortë mund t’i shërbejë Kosovës. Një LDK e dobët është në interes vetëm të kundërshtarëve politikë, që duan një skenë politike pa alternativë”, ka deklaruar ai.
Hoti ka theksuar se kuvendi do të zhvillohet në frymë demokratike, me debat të hapur dhe respekt ndërmjet anëtarëve të partisë.
“Kuvendi do të zhvillohet në frymë demokratike, të debatit të hapur e të respektit të secilit për secilin. Në këtë kuvend fitues do të jetë LDK-ja. Sepse kuvendi nuk është kundër askujt. Kuvendi është thirrur për të diskutuar dhe vendosur për të ardhmen e LDK-së. Vullnetit të kuvendit do t’i nënshtrohemi të gjithë, pa përjashtim. Nga kuvendi do të dalim të bashkuar për të ardhmen e LDK-së dhe të Republikës së Kosovës. Zoti e bekoftë LDK-në dhe Republikën e Kosovës”, ka shkruar Hoti në Facebook.
