Deputeti i Lidhjes Demokratike të Kosovës, Avdullah Hoti, për Ditën Ndërkombëtare të Punëtorëve, 1 Majin ka paraqitur katër vërejtje Qeverisë së Kosovës.
Hoti, ka thënë se pagat nuk u rriten në këtë vit, ku inflacioni ishte më i larti në 15 vitet e fundit.
“Bazuar në raportin e buxhetit për 2022, shpenzimet totale për paga të 85 mijë punëtorëve të sektorit publik (që janë 1/4 e punëtorëve në nivel vendi) pësuan rënie me 3% krahasuar me vitin paraprak”, ka shkruar ai në një postim në Facebook.
Sipas tij, Ligji i Pagave në sektorin publik më shumë krijoi probleme se që zgjidhi.
“Ky ligj krijoi pasiguri pasi uli ndjeshëm pagat në veçanti në institucionet e pavarura dhe për profesionet e rralla në treg (ekspertët e teknologjisë së informacionit, inxhinierët e ndryshëm etj.)”, ka thënë ish-kryeministri.
Tutje, ai për Ligjin e Pagave thotë se për shkak që është shtyrë miratimi i tij pa asnjë arsye, ishte vpnë për tu buxhetuar në mënyrë të rregullt në buxhetin e vitit 2023.
Vërejtja e tretë është për Ligjin e Pagës Minimale, thotë se është harruar plotësisht, edhe pse sipas tij përbënte “reformën” kryesore të mazhorancës së majtë në pushtet.
“4. Në anën tjetër, pa asnjë konsideratë për gjendjen ekonomike, (i) u dyfishua tatimi në pronë për shumë qytetarë dhe biznese, si dhe (ii) dy herë u shtrenjtua energjia elektrike. Pavarësisht se me subvencione po ndihmohen familjet që kursejnë energji, si dhe janë ndihmuar bizneset gjatë vitit 2022, në fund të fundit efekti makroekonomik është i njëjtë pasi po përdoren tatimet e qytetarëve për këto subvencione. Këto tatime do të mund të shkonin për të mira të tjera publike shumë më të nevojshme, siç është arsimi dhe shëndetësia”, ka shkruar Hoti. /teve1.info/
