“Kjo nuk është deklarata më përfekte e mundshme, por është më e mira e mundshme që kemi arritur ta nxjerrim nga Brukseli”, deklaroi Kryetari i Komisionit Qeveritar për Personat e Zhdukur, Andin Hoti, pasi sot në Bruksel, Kosova dhe Serbia kanë miratuar deklaratën për personat e zhdukur.
Madje, Hoti pretendoi se Kosova ka arritur t’ia imponojë Serbisë që personat e zhdukur t’i quan “persona të zhdukur me dhunë gjatë luftës”.
“Kjo është deklaratë që tashmë më shumë se një vit ne kemi tentuar ta harmonizojmë me Serbinë. Prandaj, që nga 18 gushti, 4 prilli e deri më sot, nuk ka ndryshuar asgjë në deklaratën që është miratuar sot nga Kurti dhe Vuçiqi. Kjo nuk është deklarata më përfekte e mundshme, është më e mira e mundshme që kemi arritur ta nxjerrim nga Brukseli. Mirëpo, ne kemi arritur t’ia imponojmë Serbisë që personat e zhdukur t’i quan “persona të zhdukur me dhunë gjatë luftës”. Po ashtu, kemi arritur të përdorim këtë term i cili është pjesë e konventave ndërkombëtare”, deklaroi Hoti në një lidhje direkte në emisionin “Këndi i Debatit”.
I pyetur sa ka besim që autoritete serbe do t’i hapin arkivat, Hoti tha se ka nuk ka besim aspak që Serbia do të bashkëpunojë në zbardhjen e çështjes së personave të zhdukur.
“Nuk kam besim aspak, zero besoj që Serbia do të bashkëpunojë që ne të jemi një hap më para për zbardhjen e çështjes së personave të zhdukur. Ajo çka besoj unë është aneksi i Ohrit. Unë besoj në Bashkësinë Ndërkombëtare, në trysninë e saj, e në asgjë tjetër”, theksoi tutje Hoti në Tëvë1./teve1.info/.