Mbetjet e tre trupave të qytetarëve serbë që kanë vdekur në luftën e fundit në Kosovë i janë dorëzuar autoriteteve të Serbisë, gjatë ditës së sotme në pikën kufitare në Merdarë. Ata kanë qenë në mesin e 280 trupave të paidentifikuar deri më tash në murgun e Prishtinës. E për këta trupa të paidentifikuar që nga paslufta ka folur kryetari i Komisionit për Persona të Zhdukur, Andin Hoti.
Hoti ka thënë se ata nuk bëjnë pjesë në listën e personave të zhdukur, por që janë trupa të personave që kanë vdekur natyrshëm dhe janë tërhequr nga varrezat.
“Janë tre individ të ndryshëm dy prej tyre të cilët kanë qenë konfirmim i identiteteve nuk kanë qenë as në listën e personave të zhdukur dhe nuk ka të bëjë asgjë me personat e zhdukur. Pas luftës nga varrezat e Dragodanit dhe nga Prizreni i kanë tërhequr trupat e varrezave, dhe janë trupa të tërhequr prej varrezave si persona të vdekur natyrshëm apo cili është shkaku i tyre nuk e di, por jo të luftës”, deklaroi Hoti.
Derisa shtoi se nga janari e deri sot janë 12 identifikime të reja, ku gjashtë prej tyre u janë dorëzuar familjarëve, kurse gjashtë të tjera ende.
Ai tha se nga 45 rezultate të ADN-së, 90% prej tyre e përbëjnë ribashkimin.
“Organizata Ndërkombëtare e personave të zhdukur e cila na asiston përveç fushave të tjera në fushën e ADN-së. Ne deri në një periudhë kohore pas luftës nuk kemi mundur me bo testimin me ADN sepse nuk kemi pasur një marrëveshje të tillë me Organizatën Ndërkombëtare të personave të zhdukur. Kemi pranuar 45 rezultate të ADN-së që 90% prej tyre e përbëjnë ribashkimin, ndërkaq këtë vit nga janari deri sot janë 12 identifikime të reja por që nuk janë dorëzuar të gjitha në familjet e tyre, sepse disa prej tyre janë ende në testimet e antropologëve që i kemi në Kosovë dhe pastaj që natyrisht njoftohen familjarët dhe i dorëzohen atyre. Nga këto 12 identifikime gjashtë u janë dorëzuar familjarëve dhe gjashtë të tjera do t`u dorëzohen. Unë shpresoj se shumë shpejt do t`u dorëzohen brenda këtij muaji ose muaji tjetër”, tha Hoti./teve1.info/