Sot, në pesëvjetorin e nënshkrimit të Marrëveshjes së Uashingtonit, ish-kryeministri Avdullah Hoti ka thënë se ky dokument ishte një arritje historike për Kosovën.
Hoti tha se dokumenti do të fuqizonte partneritetin strategjik me ShBA-në dhe do ta vendoste Kosovën në qendër të zhvillimeve ekonomike në rajon.
“Marrëveshja e Uashingtonit krijonte mundësi të mëdha për Kosovën – nga projektet infrastrukturore rrugore, hekurudhore dhe energjetike, deri te shndërrimi i Fushë-Kosovës në port të thatë tregtar që do ta lidhte Kosovën me portet e Durrësit dhe Selanikut. Po të ishin zbatuar këto projekte, sot Kosova do ta kishte marrë rolin e saj si nyje tregtare dhe energjetike për rajonin dhe Evropën Qendrore,”, ka shkruar Hoti në Facebook.
Ai shtoi se marrëveshja solli edhe një përfitim të madh politik për Kosovën: njohjen nga Izraeli, duke e thyer, sipas tij, bllokadën disa-vjeçare të mungesës së njohjeve ndërkombëtare.
Megjithatë, Hoti kritikoi institucionet që erdhën pas zgjedhjeve të vitit 2021 për moszbatim të marrëveshjes.
“Fatkeqësisht, marrëveshja u neglizhua. Aso kohe opozita e cilësonte tradhti kombëtare, ndërsa sot të gjithë e pranojnë rëndësinë e saj strategjike”, u shpreh ai.
Ish-kryeministri përkujtoi se gjatë qeverisjes së tij, në periudhën shtator 2020 – mars 2021, ishin ndërmarrë hapa të rëndësishëm për zbatimin e saj, duke përfshirë: nënshkrimin e marrëveshjes për nxitje të investimeve me ShBA, hapjen e pikës kufitare në Merdarë, projektet për diversifikimin e energjisë, memorandum për sistemin 5G, përgatitjen për njohjen e diplomave me Serbinë, si dhe vendosjen e marrëdhënieve diplomatike me Izraelin.
“Pesë vjet pas, mbetet pyetja se pse Kosova humbi një mundësi të artë për zhvillim dhe forcim të aleancës me SHBA-në”, përfundoi Hoti.
