Ish-kryeministri i Kosovës, Avdullah Hoti, ka reaguar lidhur me debatet rreth projektit të gazit, duke e cilësuar atë si një çështje që tejkalon aspektin energjetik dhe infrastrukturor.
Sipas Hotit, projekti i gazit përbën një test të rëndësishëm për orientimin strategjik të Kosovës dhe raportet e saj me aleatin kryesor, Shtetet e Bashkuara të Amerikës.
“Çështja e projektit të gazit është shumë më e madhe dhe më serioze sesa po paraqitet sot. Kjo nuk është vetëm një çështje infrastrukture apo energjie – është një provë e qartë për orientimin strategjik të Kosovës dhe për raportin tonë me aleatin tonë historik, SHBA-në”, ka deklaruar Hoti.
Ai ka kritikuar qëndrimin e Qeverisë ndaj këtij projekti, duke theksuar se në rrethana të tilla heshtja nuk është zgjidhje.
“Në një kohë kur qeveria po e kundërshton këtë projekt, heshtja nuk është opsion. Reagimi qytetar është i domosdoshëm për të treguar se populli i Kosovës mbetet fuqishëm i rreshtuar krah aleancës me SHBA-në dhe vlerave euroatlantike”, është shprehur ai.
Hoti ka shtuar se Kosova nuk duhet të largohet nga rruga e partneritetit strategjik me Perëndimin, duke e cilësuar këtë si një moment kur duhet të dëgjohet zëri i qytetarëve.
“Kosova nuk guxon të largohet nga rruga që e ka sjellë deri këtu. Ky është moment për zërin e qytetarëve”, ka përfunduar Hoti./teve1.info/
