Ish – kryeministri i Kosovës, Avdullah Hoti, ka thënë se për tri vjet qeverisje nga koalicioni qeverisës Lëvizja Vetëvendosje dhe Guxo, nuk ka asnjë projekt të kryer në infrastrukturë, arsim, shëndetësi e bujqësi.
Ai duke komentuar një aktivitet që ka bërë kryeministri i Kosovës, Albin Kurti, ku ka promovuar zvogëlimin e përdorimit të qeseve të plastikës, ka thënë se në mungesë të realizmit të projekteve tjera Kurti merret me këtë gjë, ani pse ai ke vlerësuar të mirë për ambientin mospërdorimin e qeseve të plastikës.
Hoti përmes një postimi në Facebook, ka thënë se tri vjet qeverisje kanë kaluar pa asnjë orientim zhvillimor.
“Tri vjet qeverisje pa asnjë orientim zhvillimor, me normë të zhvillimit ekonomik që gati ka rënë në zero. Tri vjet të qeverisjes vetëm duke shpërndarë subvencione e transfere, të cilat kanë shkuar nga 32% në mbi 42% të buxhetit total. Tri vjet qeverisje me rënie të investimeve kapitale nga rreth 23% të buxhetit total sa ishin në qeveritë paraprake, në vetëm 15% të buxhetit total. Kjo lloj qeverisjeje vetëm zhvillim nuk sjell”, ka shkruar Hoti./teve1.info/
