Deputeti i LDK-së, Avdullah Hoti, ka ngritur shqetësime për gjendjen ekonomike në vend, duke theksuar se rritja e inflacionit, çmimet e derivateve dhe mungesa e investimeve kapitale po ndikojnë drejtpërdrejt në mirëqenien e qytetarëve.
Në një postim në Facebook, ai ka thënë se inflacioni vazhdon të rritet dhe po zvogëlon të ardhurat e familjeve.
“Inflacioni po i gërryen të ardhurat e familjeve. Edhe në muajin e fundit është rritur”, ka shkruar ai.
Sipas Hotit, edhe çmimet e derivateve kanë shënuar rritje të ndjeshme dhe nuk pritet të ketë ulje në një periudhë të afërt.
“Çmimet e derivateve janë rritur dukshëm dhe nuk pritet të ulen së shpejti”, theksoi Hoti, duke shtuar se edhe tarifat e energjisë mund të rriten sërish.
Ai ka kritikuar gjithashtu mungesën e investimeve kapitale nga ana e shtetit, duke theksuar se kjo po i kushton ekonomisë qindra miliona euro.
“Ekonomisë i mungojnë qindra miliona euro, ngase shpenzimet kapitale nga ana e shtetit mungojnë. Kjo pasi projektet madhore infrastrukturore, ku shpenzohen shuma të mëdha me ndikim zinxhiror në ekonomi, kanë ngecur ose nuk kanë nisur fare”, u shpreh ai./teve1.info/
