Është hera e tetë radhazi që ndihma nga donatorë po arrin në Kosovë brenda këtij viti.
Transporte këto të organizuara nga donatorë holandezë në bashkëpunim me organizatën për kujdesin ndaj qenëve “Animals Kosova”.
Rreth 23 ton ndihma u shpërndanë këtë të premtë për vullnetarë në qytetin e Lipjanit.
Vlera e këtij transporti të së premtes kap shifrën rreth 170 mijë euro.
Për shumë vullnetarë, këto ndihma janë shpëtim, sepse ushqimi për kafshët, shpesh blihet nga xhepi i tyre.
“Është një proces i mirë dhe na ndihmon shumë, se ne Kosovë dihet sa kem mundësi na mi kqyrë qentë endacakë e me i ushqy, por kur vijnë këto ndihma janë të mirëseardhura se prej xhepit tonë s’kemi pas mundësi. Mirë është po nuk është mjaftueshëm”, tha Ruzhdi Zeqiri.
“Mos me kon qeto ndihma, unë blej shumë bukë, qekjo është e treta herë që vi, veç prej qe po vijnë këto ndihma nja 20 qenë i kom pshtu. Veç mos me kon qeto ndihma edhe angazhimi i Sadri Sopaj, shumë kishim hjek”, deklaroi Ramadan Krasniqi.
E ka edhe nga ata që ka vite që kujdesen për qentë me shpenzime të tyre.
“Çdo ndihmë është e mirëseardhur, në momentin që ne nuk mundemi mu organizu për me i ndihmu kafshëve tona, atëherë që vjen dikush prej Holandës, një aktivist i tyre edhe i cili na ndihmon për kafshët tona. Këta kanë fillu që dy vite me na ndihmu a unë hy për vitin e 10 që edhe pa ndihmën e tyre i kom ndihmu kafshët”, tha Bajram Kazagiqi.
Themeluesi i organizatës ‘’Animals Kosova’’, Sadri Sopi tha që këto transporte vetëm gjatë këtij viti kapin vlerën rreth 2 milionë euro.
“Nevoja është e madhe, se na kanë kërku ndihma pasi që dimri i ftohtë dhe temperaturat e ulëta po gjejnë shumë këlysh rrugëve. Përndryshe ky është transporti i 8 për këtë vit donacione të holandezëve, kontributi është i tyre, gjitha pagesat i bojnë ata e ne i sjellim këtu falas dhe i ndajmë për krejt Kosovën për çdo vullnetar që iu ndihmon kafshëve. Vetëm për këtë vit është transporti i 8, diku afër 200 tonë ndihma vlera është mbi 2 milionë euro”.
Sipas Sopit në këto transporte përveç ushqimit kanë edhe gjëra të tjera si kafaze, transportierë e batanije. Ai gjithashtu bën thirrje që të ketë ndihma nga qytetarët edhe nga institucionet kosovare.
