Policia e Kosovës ka iniciuar procedurë penale ndaj një 40-vjeçari në Ferizaj, i dyshuar për posedim të paautorizuar të armës së zjarrit.
Sipas njoftimit zyrtar, rasti është raportuar rreth orës 23:45, pasi policia ka pranuar informacione se një person në një lokal në rrugën “Rexhep Bislimi” po mbante me vete armë zjarri.
Pas marrjes së informacionit, njësitet policore kanë reaguar duke dalë në vendngjarje, ku kanë identifikuar të dyshuarin dhe e kanë shoqëruar në stacionin policor për intervistim dhe procedura të mëtejme.
Gjatë hetimeve, zyrtarët policorë kanë lokalizuar dhe sekuestruar një pistoletë dhe tre fishekë, të cilat dyshohet se ishin hedhur nga i dyshuari sapo kishte vërejtur praninë e policisë.
Me urdhër të prokurorit të shtetit, ndaj M.H., 40 vjeç, është hapur rast për veprën penale “Mbajtje në pronësi, kontroll ose posedim të paautorizuar të armëve”. /teve1.info/
