Këshilltari kryesor politik i komandantit të misionit të udhëhequr nga NATO, KFOR, ambasadori Babor Hizlan, ka zhvilluar dje një takim me kryetarët e zgjedhur të komunave veriore, Mitrovicë e Veriut, Leposaviq, Zveçan dhe Zubin Potok.
Në takim morën pjesë Milan Radojeviq, Zoran Todiq, Dragisa Miloviq dhe Milos Peroviq, ndërsa delegacioni u udhëhoq nga Igor Simiç, kryetar i kaukusit të Listës Serbe në Kuvendin e Kosovës.
Në njoftim është bërë e ditur se gjatë takimit, palët shkëmbyen mendime për një sërë çështjesh që lidhen me situatën aktuale në veri të vendit dhe sfidat që i presin kryetarët e rinj.
Ndërkohë, ambasadori Hizlan i uroi ata për zgjedhjen dhe theksoi rëndësinë e një procesi të qetë dhe të rregullt tranzicioni institucional.
Ai gjithashtu u shprehu suksese në detyrat e tyre të ardhshme, duke theksuar se puna e tyre është e rëndësishme për mirëqenien e të gjithë qytetarëve që jetojnë në Kosovë.
Në fund, Hizlan rikonfirmoi angazhimin e qëndrueshëm të KFOR-it ndaj mandatit të tij të bazuar në OKB dhe sigurinë në vend.
