Zgjidhja e çështjeve teknike në politikë nuk është për njerëzit që duan zgjidhje të shpejta, tha në një intervistë ambasadori amerikan në Beograd, Christopher Hill.
Ai e vlerësoi dialogun ndërmjet Kosovës dhe Serbisë si një proces shumë të vështirë dhe se të gjithë e kuptojnë se situata është e tillë, por gjithashtu tha se në anën tjetër është i nevojshëm formimi i Asociacionit të Komunave me shumicë serbe.
“Ka një vetëdije në mesin e politikëbërësve amerikanë se serbët në Mitrovicën e Veriut dhe në Kosovë, në realitet, duhet ta zgjidhin çështjen përmes Asociacionit të Komunave me shumicë serbe”, tha Hill për Dnevnik.
“Është një çështje me të cilën po merren edhe evropianët edhe SHBA-ja dhe ndonëse nuk do të ketë përparim në çdo takim, në fund do të kemi një Asociacion”, tha diplomati amerikan.
Ai gjithashtu ka një vlerësim negativ për zgjedhjet e fundit të mbajtura në veri, të cilat u mbajtën me bojkotimin e shumicës së serbëve në këto komuna – kur është fjala për përmirësimin e marrëdhënieve në mes të Kosovës dhe Serbisë.
“Nuk besoj se këto zgjedhje mund të kenë një ndikim afatgjatë pozitiv në komunat me shumicë serbe dhe është e rëndësishme për mua që të fokusohemi dhe ta tejkalojmë atë dhe të mbërrijmë në Asociacionin e Komunave me shumicë serbe”, tha Hill.
“Kur ke çështje teknike në politikë, nuk është për njerëzit që duan zgjidhje të shpejta. Zgjidhja e tyre kërkon kohë. Dallimet janë të thella dhe është koha që njerëzit të fillojnë të dëgjojnë më mirë njëri-tjetrin për të gjetur një zgjidhje”, theksoi ai.
