Para më shumë se dy vitesh, mijëra qytetarë dolën në rrugët e kryeqytetit duke kërkuar drejtësi për ish-krerët e Ushtrisë Çlirimtare të Kosovës që po gjykohen në Hagë.
Protesta ishte masive dhe u dërgua një mesazh i fuqishëm nga qytetarët e Kosovës në drejtim të Gjykatës Speciale.
Megjithatë, që nga ajo kohë kanë munguar tubime të tilla, ndonëse në mesin e qytetarëve vazhdojnë të ekzistojnë pakënaqësi të shumta për mënyrën se si po zhvillohet procesi gjyqësor ndaj veteranëve të UÇK-së.
Ish-deputeti i Kuvendit të Kosovës dhe veterani i Ushtrisë Çlirimtare të Kosovës, Hisen Berisha, shprehet tejet kritik për heshtjen e institucioneve por edhe organizatave të shoqërisë civile.
“Heshtja e qeverisë, heshtja e institucioneve dhe shoqatave të shoqërisë civile para një padrejtësie të tillë unë mendoj se është një lloj bashkëpërgjegjësie. Duhet ta pyesim veten pse nuk ka një reagim qytetar për faktin se atje nuk kemi të bëjmë me gjykim të individëve, por kemi të bëjmë me gjykim të asaj siç e quajnë ndërmarrje e përbashkët kriminale”, ka thënë Hisen Berisha.
Por, ish-nënkryetari i Organizatës së Veteranëve të Luftës së UÇK-së, Nasim Haradinaj, ka njoftuar se po bëhen përgatitje për një revolte gjithë popullore kundër Gjykatës Speciale.
Haradinaj, ka kërkuar mbështetje nga të gjitha partitë politike në vend.
“Unë po mendoj se do të ketë një revoltë gjithë popullore. Jemi kritik edhe ndaj atyre që kanë kërkuar vota por nuk janë në gjendje për ta konstituuar Kuvendin. Të gjithë kanë përgjegjësi për këtë situatë në bazë të fuqisë që e kanë. Ndërsa e dyta është se Gjykata Speciale nuk po e trajton Kosovën dhe nuk i bëhet vonë për drejtësi duke i thyer rregullat juridike”, ka thënë Haradinaj.
Së fundmi Platforma “Liria ka emër” ka mbajtur një konferencë për media, ku kanë numëruar shkeljet që Gjykata Speciale në Hagë po bën ndaj krerëve të UÇK-së, ndërsa nuk e kanë përjashtuar mundësinë që të organizohen protesta të reja.
