24 orë më parë, dha një deklaratë të re.
I pari i Lidhjes Demokratike të Kosovës njoftoi se partia e tij heq dorë nga çdo kërkesë për pozita, përfshirë edhe atë të presidentit.
Por për këtë post, Abdixhiku tha se LDK do të kontribuojë, veçse të jetë një kandidat konsensual.
Pas këtyre qëndrimeve, vlerësohet se përgjegjësia tashmë bie plotësisht te Lëvizja Vetëvendosje.
“Me gjeneroz në këtë aspekt duhet me qenë Kurti, sepse është më i madhi, i ka 47 përqind. Këta tjerët janë më të vegjël. Nuk mundemi një partie që i ka 7 deputetë me ia lanë fajin pse nuk bohet Qeveria. Kuvendi me një parti që i ka 53 deputetë, të gjitha mundësitë i ka të hapura. Mos të na vonojë, le ta konstituojë Kuvendin edhe le të vazhdojë përpara”, shprehet analistja Pranvera Ejupi.
Sipas Ejupit, në këtë gjendje që ndodhet vendi, nuk duhet të ketë më vonesa.
“Tash është topi dhe përgjegjësia komplet në anën e Kurtit për me i themelu institucionet. Nuk ka më vend për arsyetime dhe prolongime”, deklaron Ejupi.
Edhe analisti tjetër politik, Argjend Softolli, e sheh situatën si një mundësi për shmangien e zgjedhjeve të reja.
“Ne kemi një mundësi reale që t’i krijojmë institucionet dhe t’i shmangim zgjedhjet. Se kush dëshiron t’i shmang zgjedhjet është vetëm Kurti, për arsye se i njëjti deklaroi sot që i ka ftuar edhe partitë e tjera politike, në këtë rast PDK-në dhe AAK-në, për shkak se nuk e di për cilën arsye i ka thirrë në takim, kur Kurti me LDK tashmë i kanë numrat”, thotë Softolli.
Që nga zgjedhjet e 7 qershorit, LDK mori pjesë në të gjitha takimet që kreu i Vetëvendosjes, Albin Kurti e ftoi, në përpjeke për një marrëveshje politike.
