Mesfushori Jordan Henderson është kthyer në Premier League, pasi të martën është prezantuar te skuadra e Brentfordit.
Henderson rikthehet në futbollin anglez pas periudhave të shkurtra që i pati në Arabinë Saudie, me ekipin Al-Etiffaq dhe në Holandë me Ajaxin.
Ai është transferuar si lojtar i lirë te Brentfordi, ekip me të cilin ka firmosur kontratë dyvjeçare dhe do ta bartë fanellën me numrin 6.
35-vjeçar po vlerësohet si përforcim i rëndësishëm për mesfushën e Brentfordit, duke pasur parasysh përvojën e tij.
Henderson për 12 vjet ka qenë pjesë e Liverpoolit dhe me këtë skuadër ka fituar të gjithë trofetë e mundshëm, përfshirë titullin e kampionit të Anglisë dhe trofeun e Ligës së Kampionëve.
Gjithashtu, Henderson ka edhe 84 paraqitje për Kombëtaren e Anglisë.
