Kombëtarja U18 e Kosovës në hendboll e ka përfunduar me fitore paraqitjen në Kampionatin Botëror në Chuzhou të Kinës.
Të premten në orët e para të mëngjesit, sipas kohës në vendin tonë, Kosova fitoi ndaj Nigerisë me rezultatin 21:18. Ndeshja ishte e vlefshme për vendin e 23-të. Pra Kosova U19 ka përfunduar e 23-ta prej 32 ekipeve kombëtareve pjesëmarrëse në Botëror.
Për hendbollistet tona të reja është paraqitja e parë në Botëror. Në fakt për herë të parë një ekip kombëtar i Kosovës në konkurrencë të sportisteve, në sportet ekipore, është kualifikuar dhe është paraqitur në Botëror. Dhe në pjesëmarrjen e parë nëntë ekipe kombëtare janë lënë prapa.
Pjesa e parë e ndeshjes me Nigerinë ishte e fortë dhe e barabartë. Përfundoi 7:7. Në pjesën e dytë Kombëtarja jonë, përkundër telasheve me lëndime, shfaqi më tepër dhe arriti fitore. Kombëtarja jonë ishte vazhdimisht në epërsi dhe fitoi në fund me rezultat 21:18.
Diona Dreshaj i shënoi 10 gola për Kosovën dhe u shpall më e mira e ndeshjes. Arjeta Imeraj, Orgesa Gola e Andra Uglani i shënuan nga 3 gola.
Botërorin e parë të saj, Kosova U18 e përfundoi me tri fitore e katër disfata.
Paraqitja në Botëror është sukses i madh i kësaj kombëtareje dhe hendbollit kosovar në përgjithësi. Përvoja në Kampionatin Botëror do të jetë përvojë me rëndësi shumë të madhe për karrierën e mëtejme të kësaj gjenerate, prej të cilës pritet shumë.
