Hendbollistet e Kosovës e kanë përfunduar me sukses hapin e parë në rrugën drejt Kampionatit Botëror.
Të premten mbrëma fituan me katër gola dallim ndaj Belgjikës, 32:28. Telashe nuk patën as në duelin e dytë ndaj Bosnjë-Hercegovinës. Rezultati ishte edhe më i thellë madje. “Dardanet” i mposhtën hendbollistet boshnjake me rezultatin 32:26, me gjashtë gola dallim. Ndeshjet e Grupit 2 u zhvilluan në Hasselt të Belgjikës dhe ishin të rëndësishme për “Botërorin 2025”. Tani Kosova do të luajë në fazën e plejofit dhe është vetëm një hap larg avancimit në Botërorin që vitin tjetër organizohet në Holandë dhe Gjermani.
Të shtunën shkëlqeu Leonora Demaj. Kapitenia e Kosovës shënoi 13-të gola ndërsa pati 15 tentime.
Lojë shumë të mirë pati edhe Marigona Hajdari që shënoi gjashtë herë nga tetë tentime. Me nga katër gola në këtë fitore kontribuuan Fitore Aliu Berisha dhe Albina Rugova Tahirukaj.
Portieria Aurora Kryeziu po ashtu luajti rol në fitore me 11 pritje nga 30 gjuajtje sa shkuan në drejtim të saj.
Desire Kolasinac ishte më e dalluara te Bosnjë-Hercegovina me tetë gola në 11 tentime.
Në rrugën drejt Kampionatit Botëror të edicionit të kaluar, Kosova kishte arritur që të kalonte në fazën e dytë kualifikuese. Por në atë rast, Kosova humbi nga Polonia dhe nuk e kishte arritur suksesin historik.
Kosova kundërshtarin e radhës në fazën e dytë kualifikuese do ta mësojë më 14 dhjetor, në shortin që do të tërhiqet në Vjenë.
Plejofi do të zhvillohet me dy ndeshje në muajin prill të vitit të ardhshëm.
Ndërkohë, Kampionati Botëror do të organizohet nga 27 nëntori deri më 14 dhjetor, në vitin e ardhshëm.
