Javën tjetër, Kombëtarja e Kosovës në hendboll në konkurrencën e meshkujve fillon garimin në fazën e dytë kualifikuese apo fazën kryesore të kualifikimeve për Evropianin e vitit 2026.
Kosova është në Grupin 6 së bashku me Holandën, Ishujt Faroe e Ukrainën kurse “Dardanët” synojnë kualifikimin historik në Evropian edhe pse nuk do ta ketë lehtë.
Ndeshjen e parë, Kosova e luan më 6 nëntor në udhëtim kundër Ishujve Faroe kurse katër ditë më vonë, përballet me Holandën në Prishtinë.
Selektori i Kosovës, Bujar Qerimi të mërkurën ka bërë publike listën e hendbollistëve për këto dy ndeshje të rëndësishme.
Qerimi ka ftuar 16 lojtarë, ku Lionel Mirdita që bën karrierë në Zvicër është emër i ri, ndërsa në ekip kthehen Drilon e Drenit Tahirukaj.
“Dardanët” të hënën marrin rrugën drejt Ishujve Faroe, ku do t’i kenë katër stërvitje para ndeshjes që do të luhet në Torshavn.
Dy të parët në grup kualifikohen në Evropian, ndërsa kualifikimin e sigurojnë edhe katër kombëtaret më të mira të pozitës së tretë prej tetë grupeve sa janë në total në këto kualifikime.
