Amerikani i Vëllaznimit, Jericole Hellems ka fituar epitetin e basketbollistit më të mirë për xhiron e fundit në Superligën e Kosovës.
Federata e Basketbollit të Kosovës (FBK), ka njoftuar të hënën, se Hellems është shpallur “MVP i Javës” pasi kishte indeksin më të lartë në xhiron e 21-të.
Hellems me 37 pikë, 7 kërcime e 2 asistime, udhëhoqi Vëllaznimin në fitoren e rëndësishme në udhëtim te Peja, për t’u shpallur “MVP” por edhe për t’u përfshirë në ekipin më të mirë të javës.
Krahas Hellemsit, pjesë e ekipit “Top 5” janë edhe Alex Lomax i Sigal Prishtinës, Tyrel Cheese i Borës, Shawn Jones i Trepçës dhe Kentrell Pullian i Rahovecit 029.
Lomax pati 24 pikë, 7 kërcime e po aq asistime te Sigal Prishtina që u mposht në kryeqytet nga Trepça, ekip ku u veçua Jones me 16 pikë, 6 kërcime e 1 asistim.
Cheese ishte më dalluari te Bora që triumfoi ndaj Bashkimit pasi e mbylli ndeshjen me 32 pikë, 7 kërcime e 3 asistime ndërsa Pullian me 29 pikë, 4 kërcime e 5 asistime ishte më efikasi në fitoren e Rahovecit 029 kundër Golden Eagle Yllit.
