Kosova dhe Shqipëria në takimin e së hënës realizuan mbledhjen e tetë të përbashkët të dy qeverive.
E njohësja e çështjeve politike, Alma Lama, thotë se marrëveshjet që derivuan nga kjo mbledhje, janë vazhdimësi e atyre që janë arritur në të kaluarën.
“Mendoj që edhe kjo mbledhja e përbashkët e dy qeverive të Kosovës dhe Shqipërisë, është vazhdimësi e mbledhjeve të më hershme të cilat kanë pasur më shumë pompozitet, por pak rezultate për sa i përket bashkëpunimit dhe implementimit të këtyre marrëveshjeve. Në lidhje me marrëveshjet e sotme, mendoj që në rast se bëhet një së paku që është studimi i fizibilitetit për hekurudhën do të ishte shumë shumë e vlefshme, nga ana e dy qeverive, sepse projekti hekurudhor mendoj që është jashtëzakonisht i rëndësishëm”, tha Lama.
E të një rëndësie të madhe, çështjen e hekurudhave e cilëson edhe eksperti i komunikacionit Bekim Ahmeti.
“Aktualisht është vetëm plani i fizibilitetit, marrëveshjet janë shkruar, tash dashtë Zoti që punimet të fillojnë sa më shpejtë, të përfundoi projekti dhe pastaj të vazhdojmë me punime, edhe afati kohor në kushte normale dhe optimale do të ishte dy dreri në tri vite maksimumi… pastaj komunikacioni do të ndahet në dysh, në njërën anë transportin mbi goma dhe transportin hekurudhorë, që do t’i kemi dy arterie kryesore që do të lidhemi me Shqipërinë dhe do të kemi dalje në det, që do të jetë shumë e favorshme si për transportin e mallrave ashtu edhe të njerëzve”, deklaroi Ahmeti.
Kryeministrat Albin Kurti e Edi Rama, projektin e hekurudhës e kanë cilësuar si më të madhin dhe më të rëndësishmin që do të shërbej për lidhjen e të dy vendeve.
Raporti i gazetarit Valmir Gallopeni.
