Hekuran Berisha, një nga talentet më premtues të futbollit kosovar, ka konfirmuar largimin nga Dukagjini i Klinës.
19-vjeçari u dallua këtë sezon me fanellën e Dukagjinit të Klinës, duke realizuar 11 gola dhe dhuruar 4 asistime në Superligë.
Dukagjini e ka shitur sulmuesin për një shumë që vazhdon të mbetet sekrete, por që ka ruajtur edhe 30 për qind të kartonit.
Mesfushori sulmues ka zyrtarizuar largimin e tij nga Dukagjini përmes një postimi emocional në rrjetet sociale, duke falënderuar klubin dhe njerëzit që e kanë ndihmuar në rrugëtimin e tij deri tani.
“Po e shënoj këtë mesazh me plot emocione për klubin KF Dukagjini! Faleminderit shumë për mbështetjen – familjes time, klubit dhe qytetit tim të zemrës – si dhe stafit, nga Presidenti Fabian Veseli, Korab Desku e deri te kryetrajneri Ismet Munishi, që më kanë mbështetur gjatë gjithë rrugës time deri ku jam sot.”
“Kam kaluar të gjitha gjeneratat e grupmoshave në këtë klub, ku jam rritur si futbollist dhe si person me karakter. Kam qenë pjesë e një grupi shumë mbështetës dhe e ndjej Dukagjinin si shtëpinë time të dytë.”
“Po largohem për të bërë një hap tjetër në karrierën time, por KF Dukagjinit, klubit ku jam formuar, i uroj suksese të shumta gjatë gjithë rrugëtimit.”
“Do ta keni përherë mbështetjen time,” përfundoi Berisha, duke shprehur mirënjohje për klubin që e rriti.
Transferimi i tij te Dinamo City shihet si një hap i rëndësishëm për të vazhduar rritjen profesionale dhe për të sfiduar veten në një ambient të ri futbollistik.
