Këtë vit Procesi i Berlinit do të mbahet në Londër më 22 tetor, ku do të marrin pjesë gjashtë vendet e Ballkanit Perëndimor përfshi Kosovën.
Qëllimi i këtij procesi është qe vendet e rajonit të rrisin bashkëpunimin mes vete para se anëtarësohen në Bashkimin Evropian.
Profesori nga Westminster University ne Londër, Aidan Hehir, thotë se Britania e Madhe duke qenë nikoqire e këtij procesi dëshmon edhe njëherë se është e përkushtuar për sigurinë ne rajonin e Ballkanit Perëndimor.
Megjithatë ai thotë se Serbia vazhdon të paraqes rrezik për shtetet e rajonit.
“Shpresoj që kjo është dëshmi se Britania e Madhe do të luajë një rol të rëndësishëm në Ballkanin Perëndimor. Britania ka interesa ekonomike në këtë rajon, por mbi të gjitha ka interesa në fushën e sigurisë. Gjatë viteve të fundit, Britania ka qenë e përfshirë në zhvillimet që kanë ndodhur në Ballkan dhe ka ndihmuar në evitimin e konflikteve. Megjithatë, rajoni po përballet me sfida të brendshme të sigurisë, siç është rritja e nacionalizmit agresiv serb. E kemi parë ndikimin e Serbisë në Republikën Sërpska në Bosnje dhe Hercegovinë, në Kosovë me sulmin në Banjskë më 2023, dhe një vit më vonë në Kanalin Ibër–Lepencit. Në të njëjtën kohë, Perëndimi është shpërqendruar disi nga zhvillimet në këtë rajon për shkak të luftës në Ukrainë dhe konfliktit në Gaza. Politika e butë që ka karakterizuar për vite të tëra qasjen e Perëndimit ndaj Serbisë nuk po funksionon më, prandaj duhet të ndalet”, thotë Hehir për Tëvë1.
Eksperti për Ballkanin Perëndimor thotë se shtetet kyçe të Bashkimit Evropian duhet t’i detyrojnë shtetet t’i zbatojnë marrëveshjet e arritura në kuadër të Procesit të Berlinit.
Bosnja Hercegovina akoma nuk e ka zbatuar marrëveshjen për lëvizjen e lire për qytetarët e Kosovës.
“Procesi i Berlinit u hartua si një zëvendësim për zgjerimin e BE-së, i cili prej kohësh ka ngecur. Për këtë arsye, procesi nuk ka mekanizma që mund t’i detyrojnë shtetet të zbatojnë marrëveshjet. Megjithatë, shtetet kryesore brenda bllokut evropian dhe Britania e Madhe duhet të ushtrojnë presion që këto marrëveshje të zbatohen. Çështja e Bosnjës është më komplekse për shkak të Republikës Sërpska dhe Milorad Dodikut, i cili gëzon mbështetje si nga Putini në Moskë, ashtu edhe nga Vuçiqi në Serbi”, shprehet Hehir.
Përfaqësuesit e lartë evropian përmendin vazhdimisht nevojën e kryerjes së reformave të nevojshme nga vendet e Ballkanit, në mënyrë që rajoni të integrohet sa më shpejt në Bashkimin Evropian.
