Drilon Hazrollaj do të përshëndetet të shtunën me tifozët e Malishevës, pasi do të jetë ndeshja e tij e fundit para tifozëve të skuadrës ku u bë i njohur.
Talenti i Malishevës, arriti marrëveshje muaj më parë me skuadrën rumune Rapidi nga Bukureshti, me të cilën skuadër nënshkroi për tri vjet, me dëmshpërblim prej 900 mijë euro.
Tifozët e klubit të Malishevës, të shtunën do të organizojnë një koreografi lamtumirëse për 21-vjeçarin i cili luan ndeshjen e fundit në stadiumin “Liman Gegaj”, përballë Suharekës.
Ky është postimi i plotë i faqes “Fan club Malisheva” në Facebook:
“Të shtunën në “Liman Gegaj” do të shkruhet një kapitull i veçantë në historinë e FC Malishevës. Drilon Hazrollaj, djali që u rrit me këtë fanellë, do ta luajë ndeshjen e fundit para se të nisë një rrugëtim të ri te Rapidi i Bukureshtit.
90 ndeshje, 47 gola, 20 asiste – por mbi të gjitha, pafund emocione, përkushtim dhe krenari për qytetin dhe klubin tonë.
Drilon, ti nuk ishe vetëm një futbollist për ne – ishe frymëzim, zemër dhe simbol i bardh e kaltërve. Të urojmë sukses në çdo hap të ardhshëm dhe të falënderojmë për gjithçka që i dhe Malishevës!
E shtuna nuk është fund… është fillimi i krenarisë që do të mbajmë gjithmonë për ty!
