Organizatori i protestës “Jo në emrin tim!”, Çlirim Haziri, ka mbajtur një konferencë për media, ku ka bërë thirrje për miratimin e Projektligjit për Dhomat e Specializuara në lexim të dytë.
Haziri ka deklaruar se protestuesit tashmë janë në ditën e 20-të të protestës dhe po qëndrojnë para Kuvendit, duke kërkuar votimin e ligjit.
“Jemi këtu në ditën e 20-të të protestës. Jemi në sheshin ‘Ibrahim Rugova’, përballë Kuvendit. Po qëndrojmë tash dhe së shpejti bëhen 24 orë. Brenda i kemi deputetët e Parlamentit të Kosovës. Jemi bashkë me qytetarë nga të gjitha qytetet e Kosovës dhe po qëndrojmë me dinjitet, duke kërkuar kërkesën tonë të vetme: votimin e Ligjit për Dhomat e Specializuara.
Ndërsa, politika jonë, përfaqësuesit tanë, kanë zgjedhur që ta mos e kenë ligjin prioritet, por me ligjin e UÇK-së t’i kushtëzojnë pozicionet e tyre politike. Kështu që, unë ju bëj thirrje të gjithë deputetëve atje brenda: mos të luajnë me gjakun e Adem Jasharit, Hamëz Jasharit e Zahir Pajazitit, duke e kushtëzuar ligjin për UÇK-në me poste të Presidencës”, ka thënë Haziri.
Ai u ka bërë thirrje deputetëve që të votojnë projektligjin dhe të mos e lidhin këtë çështje me marrëveshje politike për pozita institucionale.
