Ish-kryetari i Gjilanit, Lutfi Haziri ka thënë se disa lagje në këtë komunë nuk kanë energji elektrike që 30 orë.
Ai ka thënë se qytetarët e kësaj komune përveç që u përjashtuan nga mungesa e investimeve nga qeveria, tash ata po përjashtohen edhe nga një e drejtë elementare, për të pasur rrymë.
“Sonte manifestohet “PAkënaqësia n’fundvit”, qeveria i la gjilanasit deri në 30 orë pa rrymë, mes territ e ftohtit! Prej një komune e cila ishte shembull edhe për komunat tjera për nga investimet, në një komunë të territ e mjerimit. Disa lagje nuk kanë egjergji elektrike qe më shumë se 30 orë.Për gjilanasit e Anamoravën, pos mungesës në investime dhe përjashtimit nga kujdesi i qeverisë e i Komunës, tash moskujdesi dhe përjashtimi shpërfaqet edhe në të drejtën e elementare për të pasur së paku rrymë”, ka shkruar Haziri në Facebook.
Ai duke folur për një takim që Lëvizja Vetëvendosje do të mbajë në Gjilan të shtunën ka thënë se sonte do të shprehen paknaqësit më këtë qeveri.
Haziri ka thënë se këto 4 vjet ishin të humbura për Gjilanin.
“Qeveria qendrore sonte e viziton Gjilanin, në organizimin e gastronomisë “Kënaqësi n’fundvit”. Sigurisht, sot në këtë event, qytetarët së bashku me të do ta manifestojnë PAakënaqësinë n’fundvit, pakënaqësinë gjatë gjithë këtij mandati. Fundvit n’terr për Gjilanin, edhe një vit i humbur, madje mandat i humbur për komunën tonë!”, ka shkruar ai.
