Nënkryetari i LDK-së, Lutfi Haziri e quan “meritë” të kryeministrit Albin Kurti, presionin që po i bëhet Kosovës nga ndërkombëtarët. Sipas tij, është lajm i keq që Bashkimi Evropian ka barazuar Kosovën me Serbinë.
Haziri thotë se në të kaluarën, kur kanë qenë në diskutim marrëdhëniet me Evropën apo Shtetet e Bashkuara të Amerikës, shumë kryeministra kanë dhënë dorëheqje.
“Me vetë faktin që na kanë barazuar në këtë proces është lajm i keq. Por kjo është le të themi ‘meritë’ e kryeministrit Kurti. Arriti për herë të parë që presionin me pjestu Serbia me Kosovën. Se shumë rrallë Kosova ka pasua presion, ose një lloj kërkese më shumë politike sesa presion politik, por fundja presioni, Kosovës i ka kushtuar me dorëheqjen e shumë kryeministrave. Kur është ardh në shprehje marrëdhëniet e mira me Evropë apo me Amerikë, Qeveritë e caktuar nuk kanë kalkuluar, kanë dhënë dorëheqje”, theksoi ai në “Info Nata” në Tëvë 1.
Sipas tij, “kjo situatë krejt të bën të kuptosh që dëmtimi i këtyre marrëdhënieve është dëmtim i marrëdhënieve të Qeverisë me shtetet e BE-së, por nuk është dëmtim i marrëdhënieve të popullit të Kosovës dhe kjo shpresë na mban edhe më tutje, sepse mund ndoshta në një proces të ardhshëm të riparohet më lehtë”. /Teve1.info/
