Nënkryetari i Lidhjes Demokratike të Kosovës, Lutfi Haziri ka deklaruar se asnjëri nga 16 modalitetet të cilat i ka përmendur i dërguari i posaçëm i BE-së për dialogun Kosovë – Serbi, Miroslav Lajçak për Asociacionin, nuk i përshtatet Kosovës.
Haziri tha se këto propozime janë analizuar edhe më herët por sipas tij, nuk ofrojnë ndonjë plan konkret.
“16 modele evropiane, ne i kemi analizuar dhe nuk ka plan ose praktikë në Evropë që nuk e kemi analizu në Vjenë për modalitet. Në asnjë rast nuk përputhet në raport me Kosovën, në asnjë rast nuk i përshtatet. Gjithçka është e ngushtë për Kosovën, shumë e ngushtë. Cilindo model sot merre listën, jam i gatshëm të jap detaje për mënyrën e organizimit, gjermanëve në Belgjikë, danezëve në Gjermani, ose italianëve. Gjitha modaliteteve, ka modalitete përtej Evropës që janë bërë”, ka thënë ai në emisionin “Respublika” në Tëvë1.
Po ashtu, Haziri theksoi se nuk e kanë pranuar Asociacionin, teksa thotë se kanë arritur që të bëjnë zgjidhje kompromisi në Vjenë.
“Ne kemi arritur në Vjenë ta largojmë prej tavolinës me kreativitet. Ne nuk e kemi pranuar asociacionin dhe organizimin alternativ ose asimetrik të veriut si regjion brenda Kosovës, sepse ka qenë një plan i tillë për disa javë. Ne kemi arritur me i bind dhe kemi bërë zgjedhje kompromisi. Zgjedhje kompromisi ka qenë që kemi emëruar komuna me ushtruar detyra shtesë dhe jo me leju komuna me u bashku dhe me ushtru detyra të përbashkëta”, përfundoi ai.
Javën e kaluar i dërguari i posaçëm i BE-së për dialogun, Miroslav Lajçak, ka thënë se në tavolinën e tij ka 16 modele ekzistuese funksionale për Asociacionin e komunave me shumicë serbe, që i ka ndarë me Kosovën dhe Serbinë. /Teve1.info/
