Kryetarja e Kuvendit të Kosovës, Albulena Haxhiu, ka zhvilluar një takim njoftues me përfaqësues të organizatave partnere dhe organizatave të shoqërisë civile, vendore dhe ndërkombëtare.
Sipas njoftimit të Kuvendit, në takim kanë marrë pjesë rreth 40 përfaqësues, duke shënuar takimin e parë të Haxhiut me këto organizata në cilësinë e saj si kryeparlamentare.
Takimi thuhet se u zhvillua në frymën e bashkëpunimit dhe dialogut të hapur, ku u diskutuan sfidat me të cilat përballen organizatat e shoqërisë civile, projektet që ato zhvillojnë, si dhe vërejtjet dhe sugjerimet e tyre lidhur me punën e Kuvendit.
Gjatë diskutimit është theksuar nevoja për më shumë bashkëpunim ndërmjet Kuvendit dhe shoqërisë civile për ligjet e rëndësishme, duke siguruar përfshirje dhe konsultim të hershëm.
“U nënvizua rëndësia e rritjes së transparencës, përfshirë transmetimin e drejtpërdrejtë të punës së komisioneve parlamentare dhe hapjen më të madhe të Kuvendit ndaj publikut”, thuhet në njoftim.
Pjesëmarrësit kërkuan kujdes në ruajtjen e gjuhës parlamentare dhe reagim të qartë ndaj gjuhës denigruese në seancat plenare.
Po ashtu, është theksuar nevoja për forcimin e rolit mbikëqyrës të Kuvendit, veçanërisht në aspektin e kontrollit të shpenzimeve qeveritare.
Në takim është diskutuar edhe për integrimin e perspektivës gjinore dhe vlerësimin e ndikimit mjedisor gjatë hartimit të legjislacionit, si dhe për rëndësinë e plotësimit të kapaciteteve njerëzore në komisionet parlamentare.
U theksua se roli i shoqërisë civile duhet të vlerësohet jo vetëm në aspektin e monitorimit, por edhe në ofrimin e ekspertizës profesionale për proceset legjislative.
Gjithashtu, është shprehur mbështetje për institucionet në zbatimin e Konventa e Stambollit, si dhe u potencua rëndësia e shqyrtimit të strategjisë për drejtësi tranzicionale.
Në fjalën e saj përmbyllëse, Haxhiu ka theksuar se deputetët duhet ta shohin shoqërinë civile si aleate në punën e tyre, veçanërisht deputetët e rinj që kanë nevojë për mbështetje dhe ekspertizë.
Ajo ka nënvizuar domosdoshmërinë që ligjet të hartohen dhe procedohen pa vonesa, duke e cilësuar gjuhën denigruese në Kuvend si të papranueshme dhe që kërkon reagim institucional.
“Kryetarja bëri të ditur se do të ndërmerren hapa për Kodin e Sjelljes së Deputetëve, ndërsa njoftoi se së shpejti do të funksionalizohen Grupi i Grave Deputete dhe Grupi i Deputetëve të Rinj”, thuhet në njoftim.
Në përfundim, palët janë dakorduar që takime të tilla të mbahen rregullisht dhe në formate tematike, me qëllim thellimin e bashkëpunimit dhe rritjen e koordinimit institucional në funksion të forcimit të demokracisë dhe institucioneve të vendit./teve1.info/
