E propozuara e Lëvizjes Vetëvendosje për kryetare të Kuvendit, deputetja Albulena Haxhiu ka akuzuar partitë që deri tani ishin në opozitë se “po e bllokojnë konstituimin e legjislaturës së nëntë”, pas zgjedhjeve parlamentare të 9 shkurtit.
Ajo tha se “opozitarët kanë një inat irracional”, prandaj sipas saj s’po marrin pjesë në votimin e komisionit verifikues për zgjedhjen e kryekuvendarit në mënyrë të fshehtë.
Haxhiu e cila në gjashtë tentime në votim të hapur nuk ka marrë 61 votat për kryeparlamentare, kërkoi nga Gjykata Kushtetuese që sa më shpejt të dal me një vendim në lidhje me vlerësimin e kushtetutshmërisë për ndryshimin e formës së votimit për kryetarin e Kuvendit.
“Opozita me një inat irracional ka vendosur të mos marrë pjesë në votim, duke vepruar në shpërputhje me vendimin e Gjykatës Kushtetuese të cilin e kemi përmendur dhe jeni në dijeni. Është e rëndësishme që deputetët e Kuvendit të jenë të përgjegjshëm dhe të veprojnë në përputhje me aktgjykimin e Gjykatës Kushtetuese… Përkundër faktit se kanë kaluar tri javë ne ende nuk kemi përgjigje nga Gjykata Kushtetuese. Duke pasur parasysh se konstituimi i Kuvendit është i rëndësishëm urojmë që Kushtetuesja të veprojë në përputhje me rrethanat dhe sa më parë të nxjerr vendimin mbi këtë çështje. Presim që sa më parë të kemi një vendim për këtë çështje”, tha ajo.
Duke folur për arsyet që pse partitë që deri tani ishin në opozitë nuk po e votojnë për kryetare të Kuvendit, ajo tha “sulmet ndaj saj janë seksiste dhe mizogjene”.
“Nuk i kuptoj arsyet publike që i ka bërë opozita për kundërshtimin tim. Ata më quajnë përçarëse dhe konfliktuoze, por unë jam e hapur për të diskutuara për secilin veprim politik dhe vendim gjatë karrierës politike. Asnjëherë s’kam vepruar në kundërshtim me interesat e qytetarëve dhe të Kosovës. Për dallim se shumë prej deputetëve të opozitës në të kaluarën kanë votuar kundër interesave të Kosovës… Sulmet seksite, mizogjene kanë qenë të papranueshme jo vetëm për mua por për secilën grua në politikë. Shqetësimi imë është se këto sulme seksite dhe mizogjene të cilat fyejnë gratë i dekurajojnë gratë të tjera që të jenë pjesë aktive e politikës”, shtoi ajo.
Këto komente Haxhiu i bëri pas dështimit të hënën për herë të 25-të të konstituimit të Kuvendit të Kosovës.
