Ushtruesja e detyrës së Presidentes, Albulena Haxhiu, do të zhvillojë sot një takim me Kryetarin e Komisionit Qendror të Zgjedhjeve, Kreshnik Radoniqin.
Ky takim vjen pas shpërndarjes së Kuvendit, e cila ndodhi pasi deputetët nuk arritën të zgjedhin Presidentin e ri brenda afatit të përcaktuar.
Sipas njoftimit zyrtar, takimi do të mbahet në kabinetin e Presidencës duke filluar nga ora 14:00.
“Në orën 14:00, Ushtruesja e Detyrës së Presidentes së Republikës së Kosovës, Albulena Haxhiu, pret në takim Kryetarin e Komisionit Qendror të Zgjedhjeve (KQZ), Kreshnik Radoniqi”, thuhet në njoftim.
Afati kushtetues prej 34 ditësh për zgjedhjen e Presidentit përfundoi mbrëmë në mesnatë. Sipas një aktgjykimi të Gjykatës Kushtetuese, në rast se brenda këtij afati nuk zgjidhet Presidenti, Kuvendi konsiderohet i shpërndarë automatikisht.
Haxhiu bëri të ditur se zgjedhjet e reja do të shpallen në përputhje me afatet kushtetuese.
“Sipas aktgjykimit, Kuvendi konsiderohet i shpërndarë. Zgjedhjet do të shpallen brenda afatit kushtetues”, tha Haxhiu, në fund të seancës, fiks në orën 00:00./teve1.info/
