Ushtruesja e detyrës së Presidentes së Kosovës, Albulena Haxhiu, ka reaguar lidhur me vdekjen e 25-vjeçares në Malishevë, e cila dyshohet se u vra nga bashkëshorti i saj, mbrëmjen e djeshme.
Haxhiu e ka theksuar se përderisa gratë nuk janë të sigurta, e sigurt nuk mund të jetë as shoqëria.
“Shoqëria jonë nuk mund të jetë e sigurt përderisa gratë nuk janë të sigurta as në shtëpitë e tyre”, tha Haxhiu.
Ajo shtoi se për ta arsyetuar dhunën nuk mund të përdoren as familja, e as martesa.
“As familja dhe as martesa nuk mund të përdoren për ta fshehur apo arsyetuar dhunën. Kur një gruaje i rrezikohet jeta, kjo nuk është më çështje private. Është një çështje që na përket të gjithëve dhe përballë së cilës institucionet duhet të veprojnë pa vonesë”, shtoi Haxhiu në rrjetin e saj social“Facebook”.
Tutje, Haxhiu u bëri thirrje organeve të drejtësisë që ta zbardhin plotësisht, siç e quajti ajo, këtë vrasje të rëndë.
