Kryetarja e Kuvendit të Kosovës, Albulena Haxhiu, ka reaguar pas vdekjes së ish-deputetes, mjekes, poetes dhe aktivistes për të drejtat e njeriut, Flora Brovina.
Haxhiu ka shprehur ngushëllime për familjen Brovina dhe Begu, duke e cilësuar Brovinën si një grua që gjithë jetën ia kushtoi njerëzve dhe vendit të saj.
“Kosova sot humbi Flora Brovinën, gruan që ia kushtoi gjithë jetën njerëzve dhe vendit të vet”, ka shkruar Haxhiu.
Ajo ka theksuar se Brovina, si mjeke, humaniste dhe veprimtare për të drejtat e njeriut, ishte pranë fëmijëve dhe familjeve gjatë viteve më të vështira për Kosovën.
“Organizoi, ndihmoi, protestoi dhe ngriti zërin kundër dhunës e represionit, duke e kthyer angazhimin publik në një formë të përditshme të qëndresës. Edhe kur kjo e vuri drejtpërdrejt përballë regjimit serb, nuk u tërhoq”, ka deklaruar Haxhiu.
Në reagimin e saj, kryetarja e Kuvendit ka rikujtuar edhe arrestimin e Brovinës gjatë luftës në Kosovë.
“Në pranverën e vitit 1999 u arrestua dhe u dërgua në burgjet e Serbisë, ku u dënua me 12 vjet burg. As aty nuk hoqi dorë nga bindjet e veta”, ka shkruar ajo.
Sipas Haxhiut, për lirimin e Brovinës ishin angazhuar organizata ndërkombëtare për të drejtat e njeriut, shkrimtarë dhe institucione nga vende të ndryshme të botës.
Ajo e ka cilësuar Brovinën si të burgosur politike, veterane të luftës së UÇK-së dhe pjesë të brezit që, sipas saj, sakrifikoi shumë për lirinë e Kosovës.
Haxhiu ka vlerësuar edhe kontributin e Brovinës në letërsinë shqipe.
“Flora Brovina ishte zë i veçantë edhe në letërsinë shqipe. Në vargjet që shkroi, gruaja, fëmija, dhimbja, lindja, humbja dhe liria morën formën e përvojave të jetuara”, ka shkruar Haxhiu.
Sipas saj, poezia e Brovinës pasqyronte edhe përvojat dhe sfidat e jetës së saj.
“Poezia e saj kishte butësinë e mjekes, ndjeshmërinë e gruas dhe qëndresën e njeriut që kishte kaluar nëpër sfida të rënda”, ka shtuar ajo.
Pas përfundimit të luftës, Flora Brovina vazhdoi angazhimin e saj në jetën institucionale të Kosovës. Për vite me radhë ajo ishte deputete e Kuvendit të Kosovës dhe një nga nënshkrueset e Deklaratës së Pavarësisë së Kosovës.
Në fund të reagimit, Haxhiu ka shprehur ngushëllime për familjarët, miqtë dhe bashkëpunëtorët e Brovinës.
“Ngushëllimet më të sinqerta familjes Brovina dhe Begu, miqve, bashkëpunëtorëve dhe të gjithë atyre që e njohën dhe e çmuan. I përjetshëm qoftë kujtimi për Flora Brovinën”, ka përfunduar Haxhiu./teve1.info/
