Ushtruesja e detyrës së Presidentes, Albulena Haxhiu, ka përkujtuar 147-vjetorin e themelimit të Lidhjes Shqiptare të Prizrenit, duke e cilësuar atë si një nga ngjarjet më të rëndësishme në historinë kombëtare të shqiptarëve.
Përmes një mesazhi publik, Haxhiu theksoi se Lidhja Shqiptare e Prizrenit, e themeluar më 10 qershor 1878, shënoi organizimin e parë politik dhe ushtarak të shqiptarëve për mbrojtjen e trojeve, të drejtave dhe identitetit kombëtar.
Ajo kujtoi se kjo lëvizje historike u krijua si përgjigje ndaj rrezikut të copëtimit të trojeve shqiptare pas Traktatit të Shën Stefanit dhe vendimeve të Kongresit të Berlinit, duke bashkuar figura të shquara patriotike në mbrojtje të interesave kombëtare.
Sipas Haxhiut, synimet kryesore të Lidhjes ishin ruajtja e tërësisë territoriale shqiptare, bashkimi administrativ i trojeve shqiptare dhe afirmimi i shqiptarëve si komb më vete. Ajo vlerësoi gjithashtu rezistencën e zhvilluar në Plavë, Guci, Hot dhe Grudë si dëshmi të vendosmërisë së shqiptarëve për mbrojtjen e tokave të tyre.
“Hedhur mbi themelet e sakrificës dhe përkushtimit të patriotëve shqiptarë, idealet e Lidhjes mbetën gjallë edhe pas shtypjes së saj më 1881 dhe u shndërruan në bazë të rrugëtimit drejt Pavarësisë së Shqipërisë në vitin 1912”, theksoi Haxhiu.
Në përvjetorin e kësaj ngjarjeje historike, ajo shprehu nderim për veprën e patriotëve shqiptarë, duke e cilësuar Lidhjen Shqiptare të Prizrenit si simbol të bashkimit, qëndresës dhe vetëdijes kombëtare.
