Kryeparlamentarja e Kosovës, Albulena Haxhiu, ka pritur në takim ministren për Europën dhe Punët e Jashtme të Shqipërisë, Elisa Spiropali, e cila zhvillon vizitë zyrtare në Kosovë.
Sipas njoftimit të Zyrës së Kryeparlamentares, gjatë takimit u shkëmbyen mendime mbi bashkëpunimin e ngushtë mes dy vendeve dhe rolin e institucioneve në avancimin e interesave të përbashkëta.
“Bashkëpunimi dhe përkrahja e ndërsjellë mbeten qendrore për zhvillimin tonë të përbashkët dhe për mirëqenien e qytetarëve tanë,” tha Haxhiu.
Gjatë vizitës zyrtare në Kosovë, ministrja Spiropali takoi gjithashtu presidenten Vjosa Osmani, kryeministrin Albin Kurti dhe homologun e saj, Glauk Konjufca, duke theksuar rëndësinë e koordinimit politik dhe bashkëpunimit ekonomik mes dy vendeve.
Takimet e zhvilluara synojnë thellimin e marrëdhënieve bilaterale dhe avancimin e projekteve të përbashkëta, si dhe koordinimin e politikave ndërkombëtare të Kosovës dhe Shqipërisë.
