Kryetarja e Kuvendit të Kosovës, Albulena Haxhiu, ka reaguar pas shpalljes së aktgjykimit dënues ndaj ish-krerëve të Ushtrisë Çlirimtare të Kosovës.
Haxhiu, në reagimin e saj, është shprehur se asnjë aktgjykim nuk mund ta ndryshojë natyrën e luftës.
“Lufta e Ushtrisë Çlirimtare të Kosovës ishte çlirimtare. Ajo lindi përballë shtypjes, dhunës dhe krimeve të regjimit të Serbisë ndaj popullit të Kosovës. Asnjë aktgjykim nuk mund ta ndryshojë natyrën e asaj lufte dhe as të zhbëjë të drejtën e një populli për të luftuar për lirinë e vet”, shkroi Haxhiu.
Ajo tutje tha se respekti për drejtësinë nuk nënkupton heshtje përballë çdo përpjekjeje për ta shtrembëruar historinë.
“Respekti për drejtësinë nuk nënkupton heshtje përballë çdo përpjekjeje për ta shtrembëruar historinë. Nuk duhet lejuar që dënimet e sotme të përdoren për të relativizuar krimet e regjimit të Serbisë, për ta zvogëluar përgjegjësinë për to apo për të krijuar një narrativë të rreme”, tha tutje ajo.
Në fund të postimit të saj, Haxhiu bëri thirrje për qetësi, dinjitet dhe bashkim, duke shtuar se Republika e Kosovës do ta përballojë edhe këtë, siç e cilësoi ajo, padrejtësi.
