Lëvizja Vetëvendosje iu drejtua Gjykatës Kushtetuese për situatën në Kuvend.
Të martën, ky subjekt politik dërgoi komente në Kushtetuese lidhur me ankesën e Listës Serbe për moszgjedhjen e nënkryetarit të pestë.
E një ditë pas, nënkryetarja e Kuvendit nga radhët e VV-së, Albulena Haxhiu doli në një konferencë për media.
Aty tha se s’ka të drejtë të vetos për Listën Serbe.
“Së pari dua të theksoj se shteti ynë është unitar dhe jo multietnik. Ky model është rregullatori i Republikës sonë demokratike. Në shtetin tonë të pavarur në vitin 2008, asnjë grup etnik, gjinor a shoqëror nuk e ka të drejtë ne vetos mbi organet tona që konstatojnë republikën. Ne qytetarët jemi palë të barabarta”, tha Haxhiu.
Nëse kjo ndodhë, ajo thotë se do të kishte zgjerim të Pakos së Ahtisaarit.
“Çdo hap tjetër në zgjerim të këtyre koordinatave do të përbente zgjerim të Pakos së Ahtisaarit nga ana e Gjykatës Kushtetuese. Kjo nuk duhet të ndodhë dhe duhet të kundërshtohet nga të gjithë. Gjykata Kushtetuese as nuk e ka kompetencë e as këtë legjitimitet që të gërmojë në themelet e Kushtetues tonë, pra që ta ndryshojë apo shtojën diçka në të. Është e papranueshme që Lista Serbe që nuk njeh shtetin e Kosovës dhe institucionet e saj të përdorë vendet e rezervuara si mjet për të bllokuar konstituimin e Kuvendit dhe qeverisjes demokratike”, u shpreh ajo.
Sipas Haxhiut, subjekti që ajo përfaqëson nuk ka votë për asnjë kandidat të Listës Serbe.
Edhe njëherë, Haxhiu e arsyetoi ndarjen e votimit për komunitetet veç e veç.
Të martën, Gjykatës Kushtetuese me komente për këtë rast iu drejtua edhe e para e shtetit, Vjosa Osmani.
