Ushtruesja e detyrës së presidentes së Kosovës, Albulena Haxhiu, pritet që sot të nisë konsultimet me subjektet politike lidhur me caktimin e datës për zgjedhjet e parakohshme parlamentare.
Takimi i parë konsultativ është paralajmëruar të mbahet në orën 15:00.
Një ditë më herët, ajo është takuar me kryetarin e Komisionit Qendror të Zgjedhjeve, Kreshnik Radoniqi, për të diskutuar përgatitjet lidhur me procesin zgjedhor.
Pas këtij takimi, Radoniqi bëri të ditur se data 7 qershor shihet si opsioni më i përshtatshëm për mbajtjen e zgjedhjeve. Ai theksoi se, sipas përcaktimeve të Gjykatës Kushtetuese, zgjedhjet mund të organizohen më 31 maj ose më 7 qershor.
“Ne e konsiderojmë 7 qershorin si datën më të favorshme, megjithatë vendimi përfundimtar i takon presidentes”, u shpreh Radoniqi.
Ai shtoi se data zyrtare do të caktohet në vijim, duke nënvizuar rëndësinë që KQZ të ketë kohë të mjaftueshme për përgatitje. Sipas tij, edhe buxheti për organizimin e zgjedhjeve pritet të jetë i ngjashëm me atë të proceseve të kaluara.
